Investimento de 52 millóns de euros para modernizar Nostián

Investimento de 52 millóns de euros para modernizar Nostián

A alcaldesa, Inés Rey, na rolda de prensa / Concello da Coruña

O Concello da Coruña aprobou hoxe, en Xunta de Goberno local, o anteproxecto para proceder á licitación de obras na planta de tratamento de residuos de Nostián, que leva desde a súa posta en marcha, en 2022, agardando por unha actualización.

En concreto, segundo explicou a alcaldesa Inés Rey, cun investimento de 52 millóns de euros, o Concello, titular da instalación de tratamento de residuos que utilizan outros moitos concellos da área metropolitana, aspira a conseguir «o máximo rendemento» coa modernización e adaptación da planta á nova normativa europea.

En concreto, as actuacións previstas consistirán en melloras nas infraestruturas de clasificación de residuos e tamén no referente ás áreas de persoal. «A planta de clasificación de residuos será actualizada e tamén se incrementará a súa capacidade operativa, facéndoa máis eficiente. Ademais, optimizaranse todos os dixestores da instalación para obter máis enerxía limpa ─biogás─ e remodelarase interiormente a nave de compostaxe», explicou a alcaldesa.

Tamén se acometerá a remodelación dos circuítos interiores, o que reforzará a seguridade e prevención das persoas empregadas, garantindo un illamento con respecto ás cintas de transporte de residuos, detallou Inés Rey. Para isto, Medio Ambiente contempla automatizar certos procesos coa idea de que o persoal da instalación atenda, máis en concreto, ás tarefas de control e menos ás de clasificación.

Ademais, o anteproxecto contempla a adaptación da planta á normativa europea de cinco contedores ─residuos orgánicos, envases, outros restos, papel e vidro─ e suma a xestión dun novo punto móbil para a cidade.

«Este é o segundo paso administrativo relevante que damos despois do estudo de viabilidade para licitar o contrato. Tal e como comprometimos, coa aprobación deste anteproxecto seguimos a dar os pasos necesarios con vistas a licitar Nostián neste mandato», subliñou a rexedora.


Dinahosting: dominios e aloxamento web

Miño pon en valor a ruta dos muíños do río Medio

Miño pon en valor a ruta dos muíños do río Medio

Muíño no río Medio / Concello de Miño

O Concello de Miño vén de anunciar a finalización dos traballos de rehabilitación dos catro muíños que se atopan no roteiro dos muíños do río Medio, o que supón a posta en valor dun itinerario rodeado de natureza e apto para todos os públicos.

Esta actuación, na que se investiron 48.395,04 euros, consistiu na limpeza previa do terreo e dos entullos acumulados no interior dos muíños, a reparación das cubertas, que se levou a cabo mantendo os máximos elementos posibles e utilizando materiais e cores similares aos orixinais, e a instalación de portas e xanelas.

Ademais, as obras incluíron a colocación de cartelería e información sobre o roteiro e os bens ambientais e patrimoniais que nel se atopan, como os muíños dá Graña, de Albeiro, de Amado e de Miño.

Un paraíso natural

O roteiro dos muíños do río Medio é un itinerario de dificultade media, de 1,3 quilómetros de distancia e apto para todos os públicos. Ten acceso desde Ponte do Porco e a entrada, situada xusto antes do cartel que indica que comeza o Concello de Vilarmaior, está sinalizada.

Ao comezo do roteiro, na antiga central eléctrica de Güimil, os visitantes poderán ver un panel informativo no que se detalla a información dos catro muíños, construídos pegados ao río Medio, e das especies vexetais e animais que poden atopar no seu camiño.

Ao longo do itinerario hai instalado mobiliario como bancos e papeleiras e tamén pasarelas e escaleiras de madeira.


Dinahosting: dominios e aloxamento web

Naturgy, Repsol e Reganosa proxectan un ‘hub’ de hidróxeno verde en Cerceda

Naturgy, Repsol e Reganosa proxectan un ‘hub’ de hidróxeno verde en Cerceda

Antiga central térmica de Meirama, en Cerceda / Xoán Roberes

Naturgy, Repsol e Reganosa anuncian unha alianza para desenvolver un nodo (‘hub) de produción de hidróxeno renovable en Galicia. En concreto, as tres firmas proxectan a instalación dunha planta de electrólise alimentada con enerxía 100% renovable nos terreos da antiga central térmica de Meirama, no municipio de Cerceda.

A planta de hidróxeno renovable terá unha potencia inicial de 30 megawatts (MW), escalable en distintas fases ata un potencial total de 200 MW. Producirá máis de 4.000 toneladas de hidróxeno renovable ao ano nunha primeira fase e alcanzará unha produción total de 30.000 toneladas anuais, apuntan as entidades impulsoras.

O hidróxeno renovable xerado destinarase a uso industrial para substituír o hidróxeno convencional que actualmente utiliza a refinería de Repsol na Coruña. Tamén se utilizará noutras industrias, na inxección na rede gasista para ser mesturado con gas natural e en mobilidade. 

A directora de Novos Negocios en Naturgy, Silvia Sanjoaquín, sinalou que «este proxecto permitirá acelerar a introdución do hidróxeno en sectores como o enerxético, o industrial ou o do transporte, ademais de redundar nun gran impacto sobre a economía local, nun emprazamento de transición xusta como o de Meirama». 

O hidróxeno renovable é un dos piares de Repsol na súa estratexia para alcanzar as cero emisións netas en 2050. Para Tomás Malango, director de Hidróxeno da compañía «este proxecto forma parte da estratexia de hidróxeno renovable de Repsol en Galicia e supón un fito na transformación da refinería da Coruña nun polo multienergético que proporcione produtos descarbonizados á sociedade».

O proxecto permitirá acelerar a introdución do hidróxeno en sectores como o enerxético, o industrial ou o do transporte

Pola súa banda, o director xeral de Reganosa, Emilio Bruquetas, subliñou que «hai 15 anos dotamos a Galicia dunha infraestrutura chave para a chegada do gas, e a competitividade da nosa industria mellorou substancialmente. Agora, baixo o liderado da Xunta de Galicia e rodeados dos mellores socios, estamos a participar na configuración dun novo ecosistema enerxético».

Descarbonizar a industria

Como remarcan os promotores do proxecto, o hidróxeno renovable será un piar na transformación Industrial da refinería de Repsol, pois permitirá a fabricación de produtos de baixa, nula e mesmo negativa pegada de carbono, como combustibles renovables e distintos compoñentes para o sector sanitario, téxtil ou de envasado de alimentos, entre outros.

Este hub de hidróxeno forma parte das iniciativas enerxéticas estratéxicas impulsadas pola Xunta de Galicia no marco do programa EU Next Generation e do Plan de Recuperación e Resiliencia nacional. O seu obxectivo é fomentar o crecemento económico, a xeración de emprego e o desenvolvemento dun tecido empresarial competitivo, sostible e circular.


Dinahosting: dominios e aloxamento web

Un estudo da UDC propón a recuperación integral do río Barcés

Un estudo da UDC propón a recuperación integral do río Barcés

Río Barcés / UDC

O río Barcés comunica o lago de Meirama e o río Mero, do que “beben” moitos dos concellos da área metropolitana da Coruña. A Universidade da Coruña (UDC), dentro da Cátedra Hijos de Rivera-UDC de Desenvolvemento Sustentable e co apoio da Reserva da Biosfera Mariñas Coruñesas e Terras do Mandeo, vén de presentar hoxe a segunda parte dun estudo na que chama a atención sobre a necesidade de actuar neste espazo fluvial.

En concreto, as persoas expertas que participaron na elaboración do documento propoñen medidas como a mellora da conectividade do río, a limitación das vías de entrada para especies invasoras ou a limitación do uso forestal e da presión agrícola como actuacións prioritarias.

Na mesma liña, suxiren o reforzo da cobertura arbórea do bosque de ribeira, favorecendo a segunda ringleira en tramos dunha liña e formando zonas núcleo restaurando bosque nos meandros do río, un patrón de nodos e conectores que favorezan a conectividade.

Os bosques de ribeira como o Barcés son formacións naturais que actúan como elemento protector e regulador para moitas especies sensibles e procesos ecolóxicos, e achegan servizos ecosistémicos esenciais como servir de filtro de contaminantes, previr avenidas e regular a calidade da auga limitando o quecemento. Ademais, o bosque de ribeira ten un gran valor paisaxístico, recreativo e cultural.

O estudo, presentado hoxe, Bosque de ribeira do río Barcés, un proxecto de futuro, financiada pola Cátedra Hijos de Rivera-UDC de Desenvolvemento Sustentable, coordinada pola Reserva da Biosfera Mariñas Coruñesas e Terras do Mandeo, e desenvolvido polo equipo da UDC baixo a direción das investigadoras María José Servia e Jaime Fagúndez.

O bosque de ribeira ten un gran valor paisaxístico, recreativo e cultural

Comezou no ano 2021 cunha primeira fase de estudo do bosque de ribeira, o seu estado de conservación e posibles problemáticas ambientais que puidesen reverterse, mentres que esta segunda parte centrouse na avaliación do seu estado ecolóxico

Especies invasoras

Nesta segunda fase, os traballos de prospección detectaron no curso do río diferentes problemas asociados á perda de naturalidade por presenza de especies exóticas invasoras (nun 85,7% dos tramos), e por presión de especies forestais (nun 74,2%).

As invasoras máis frecuentes foron Tradescantia fluminensis, atopada en 14 dos 35 subtramos, e a falsa acacia (Robinia pseudocacia) en sete.

Os impactos de perda de continuidade do bosque por estradas acada o 37,1%, e por gasodutos ou liñas de alta e media tensión, un 40%.  A perda de estrutura horizontal do bosque observouse nun 57,1%, e lonxitudinal nun 28,5%. Outros impactos indirectos proveñen dos cambios na dinámica do río como as canalizacións ou barreiras, e a presenza de residuos no bosque.

O proxecto continúa avanzando con vocación de axudar a administracións e propietarios a facer un uso sustentable do río Barcés e a súa contorna, mellorar o estado do seu bosque de ribeira, e conservar os seus tesouros, apuntan os seus promotores.


Dinahosting: dominios e aloxamento web

Navantia fecha un novo acordo para a construción de 62 ‘jackets’ en Fene

Navantia fecha un novo acordo para a construción de 62 ‘jackets’ en Fene

Vista do estaleiro de Navantia en Fene / Navantia Seanergies

O estaleiro público Navantia vén de anunciar a sinatura dun acordo de reserva de capacidade coa firma Ocean Winds para a fabricación por parte do consorcio Navantia-Windar de 62 ‘jackets’ para aeroxeradores nas súas instalacións de Fene, con destino ao seu parque eólico mariño de Dieppe le Tréport, en augas do norte de Francia.

Este proxecto, que se materializará proximamente nun contrato, é o de maior envergadura encargado a Windar-Navantia até a data. O parque francés de Dieppe le Tréport contará cunha capacidade de xeración de 496 megawatts (MW), suficientes para abastecer de electricidade sostible unhas 850.000 persoas ao ano a partir de 2026.

O parque é propiedade do consorcio formado pola empresa española Ocean Winds (formada pola francesa ENGIE e a portuguesa EDP Renováveis), a xaponesa Sumitomo Corporation e a entidade financeira francesa Banque des Territoires.

O contrato é o de maior envergadura encargado a Windar-Navantia até a data

Os traballos de fabricación iniciaranse no estaleiro de Fene no primeiro trimestre de 2023, cunha duración aproximada de dous anos e catro millóns de horas de traballo.

As ‘jackets’ son un tipo de cimentación fixa realizada en aceiro que serve de base para os aeroxeradores que se instalan no mar. As deste contrato serán jackets de catro patas, cun peso de ao redor de 1.000 toneladas.

Ademais, Navantia Seanergies construirá en Puerto Real dous jackets de subestación, unha delas para a subestación eléctrica deste parque e a segunda destinada ao parque de Îles d’Yeu et Noirmoutier. Ambos os proxectos contan con capacidade reservada en Puerto Real desde o pasado xuño.

Este mesmo proxecto tamén dará ocupación adicional a Windar Renovables, que nas súas instalacións de Avilés fabricará 248 piles.

Encarga de monopiles

Ocean Winds xa anunciou o pasado mes de xullo a contratación a Navantia-Windar en 2022 de 14 monopiles que se construirán na nova fábrica de Fene. Os monopiles son un tipo de cimentación fixa, distinta da jacket, que consiste nun piar único para cada aeroxerador.

Navantia Seanergies é a marca de Navantia para o negocio de enerxías verdes. Foi lanzada en abril de 2022 coa previsión de asinar contratos valorados en 500 millóns de euros nos seus primeiros meses e lograr a medio prazo unha facturación de máis de 350 millóns de euros ao ano.


Dinahosting: dominios e aloxamento web